Azərbaycan, Bakı, 25 avqust /Trend, müxbir Zülfiyyə Qurbanova/
Gürcüstana il ərzində Azərbaycan istehsallı tikinti materiallarının idxal həcmini 13,7 faiz artıb. Trend-in məlumatına görə, bu barədə Gürcüstan Milli Statistika Xidmətinin 2014-cü ilin yanvar-iyul aylarının nəticələri üzrə xarici ticarət haqqında hesabatında deyilir.
Hesabata əsasən, 2014-cü ilin yanvar-iyul aylarında Gürcüstan Azərbaycandan 13,15 milyon dollar dəyərində 76,95 min ton inşaat gipsi və digər anhidritlər alıb ki, bu da ötən ilin analoji dövründəkindən 13,26 min ton çoxdur. Müqayisə üçün: ötən ilin yanvar-iyul aylarında Gürcüstana 11,57 milyon dollar məbləğində 63,69 min ton tikinti materialı idxal edilib.
Hesabat dövründə Azərbaycandan Gürcüstana idxalın ümümi həcmində tikinti materiallarının xüsusi çəkisi 3,8 faiz təşkil edib.
Ümumilikdə 2014-cü ilin yanvar-iyul aylarında Gürcüstan Azərbaycandan 347,28 milyon dollar dəyərində məhsul alıb. Hesabata görə, bu dövrdə Azərbaycandan Gürcüstana idxalın həcmi 6,97 faiz artıb. Müqayisə üçün: ötən ilin yanvar-iyul aylarında Gürcüstan Azərbaycandan 324,66 milyon dollar məbləğində məhsul idxal edib.
