Azərbaycan, Bakı, 5 sentyabr /Trend, müxbir Zülfiyyə Qurbanova/
Azərbaycanda ödəniş kartlarının sayı ilin əvvəlindən 2,7 faiz artaraq 2014-cü il iyul ayının yekunu üzrə 5 827 min ədəd təşkil edib. Trend-in məlumatına görə, bu barədə Azərbaycan Mərkəzi Bankının (AMB) 2014-cü ilin yanvar-iyul ayının nəticələri üzrə hesabatında deyilir.
2013-cü ilin müvafiq dövrünün göstəricisi ilə müqayisədə kartların sayı 8,4 faiz artıb.
Kartların ümumi sayından 4 670 min ədədi debet kartlara, 2 559 min ədəd sosial kartlara, 1 398 min ədəd əməkhaqqı, 713 min ədəd isə digər kartlara aiddir. Kredit kartlarının miqdarı 1 158 min ədəd təşkil edib.
AMB-nin hesabatına əsasən, yanvar-iyulda bankomatların və POS-terminalların köməyi ilə ödəniş kartları üzrə ümumi dövriyyə 6,724 milyard manat, əməliyyatların ümumi sayı isə 44,826 milyon ədəd təşkil edib.
Debet kartlar üzrə əməliyyatların sayı 35,285 milyon ədəd olmaqla 5,423 milyard manat təşkil edib.
Debet kartlar üzrə əməliyyatların ümumi sayından ölkə daxilində bankomatların köməyi ilə 4,901 milyard manat məbləğində 28,446 milyon əməliyyat, POS-terminallar vasitəsilə isə 341 milyon manat dəyərində 2,079 milyon əməliyyat həyata keçirilib.
Kredit kartları ilə bu dövrdə 1,3 milyard manat məbləğində 9,541 milyon əməliyyat həyata keçirilib.
Kredit kartları üzrə əməliyyatların ümumi sayından bankomatların köməyi ilə 681 milyon manat məbləğində 2,938 milyon əməliyyat, POS-terminallarla isə 289 milyon manatlıq 4,3 milyon əməliyyat aparılıb.
2014-cü il avqustun 1-nə ölkədə 2 493 bankomat fəaliyyət göstərib ki, onlardan 1 399 ədədi Bakıda, 1 094-ü isə ölkənin digər şəhər və rayonlarında yerləşir. İl ərzində onların ümumi sayı (2013-cü il avqustun əvvəli ilə müqayisədə) 125 ədəd və ya 5,3 faiz artıb.
2014-cü il avqustun 1-nə POS-terminalların sayı 53 988 ədəd olub ki, bundan 37 189 ədədi Bakıda, 16 799-u isə ölkənin digər şəhər və rayonlarında yerləşir. 2013-cü ilin yanvar-iyul ayları ilə müqayisədə POS-terminalların sayı 17 600 ədəd, yaxud 48,4 faiz artıb.