Azərbaycan, Bakı, 29 yanvar /Trend/
Azərbaycan Dövlət İqtisad Universitetində (ADİU) "Bank of Baku"nun tədris laboratoriyasının rəsmi açılış mərasimi keçirilib.
"Bank işi" laboratoriyası "Bank of Baku"nun dəstəyi ilə istifadəyə verilib. Bank və universitet rəhbərliyinin qatıldığı tədbirdə tələbə və müəllimlər də iştirak edib.
"Bank of Baku"nun İdarə Heyətinin sədri Fərid Hüseynov və ADİU-nun rektoru, professor Ədalət Muradov "Sabah" qrupları üçün hazırlanmış tədris otağı ilə tanış olublar.
Öz çıxışında Ə.Muradov qeyd edib ki, ali məktəbdə laboratoriya yaratmaq təşəbbüsü "Bank of Baku"dan gəlib və bu, çox təqdirəlayiq bir haldır. Universitet rektoru laboratoriya açılışının ikitərəfli əməkdaşlıqda bir başlanğıc olduğunu vurğulayıb.
Öz növbəsində, "Bank of Baku"nun İdarə Heyətinin sədri F.Hüseynov bildirib ki, istifadəyə verilən laboratoriya tələbələr üçün nəzərdə tutulub və bu, bankın sosial yönlü siyasətinin bir təzahürüdür.
Daha sonra müəllim-tələbə heyəti üçün "Bank of Baku"nun fəaliyyəti barədə təqdimat keçirilib. Təqdimat çərçivəsində bankın İdarə Heyətinin sədr müavini Zaur Qaraisayev "Bank of Baku"nun təqaüd proqramı, müraciət şərtləri və qaydaları haqda məlumat verib. Bildirilib ki, təqaüd proqramına universitetə 450-dən çox balla qəbul olunan və son sessiyanın nəticəsinə görə 70-dən yuxarı bal toplayan 3 və 4-cü kursların tələbələri sənədlərini təqdim edə bilər. Təqaüd alan beş tələbə eyni zamanda bankda təcrübə keçmək imkanı əldə edəcək.
Təqdimatdan sonra universitetdə Karyera Günü tədbiri keçirilib. Tələbələrə bankda olan cari vakansiyalar barədə ətraflı məlumat verilib.
Xatırladaq ki,"Bank of Baku" ilə Azərbaycan Dövlət İqtisad Universiteti ötən il əməkdaşlıq sazişi imzalayıblar. İkitərəfli saziş bankla təhsil ocağı arasında əməkdaşlığın əsas istiqamətlərini müəyyən edir.
