AR Kənd Təsərrüfatı Nazirliyindən Trend ə verilən məlumata əsasən, dünən nazir İsmət Abasov İsrayil səfiri Eytan Nae ilə görüşüb. Görüşdə İ.Abasovun İsrayilə 14-17 iyun səfərinin yekunları müzakirə olunub.
Nazir Eytan Naeni öz səfəri haqqında məlumatlandırıb. İ.Abasovun dediklərinə görə, o, İsrayilin kənd təsərrüfatı sahəsinin, xüsusilə üzümçülük, meyvəçilik müəssisələrinin nümayəndələri ilə görüşüb, suvarma-istixana avadanlığı ilə tanış olub. Nazir, həmçinin bildirib ki, həmin müəssisələrin nümayəndələri Azərbaycanda bizneslə məşğul olmaq istəklərini bildiriblər.
E.Nae vurğulayıb ki, İsrail sahibkarları həmişə kənd təsərrüfatı sahəsində Azərbaycanla əməkdaşlığı inkişaf etdirməyə hazırdılar. İki ölkə arasında kənd təsərrüfatı sahəsində əməkdaşlıq haqqında sazişin imzalanmasına gəldikdə nazirlikdən bildiriblər ki, hazırda həmin layihə üzrə təkliflər təsdiqlənmək üçün Nazirlər Kabinetinə təqdim olunub.
