Kənd Təsərrüfatı Nazirliyi yanında Dövlət Meliorasiya və Su Təsərrüfatı Agentliyi iki tender elan edib. Trend in xəbər verdiyi kimi, birinci tender drenaj-suvarma şəbəkələrinin bərpası və Cəlilabad rayonundakı Göytəpə su anbarının tikintisi, ikinci tender isə (2 lot) Taxtakörpü su anbarının tikintisinə hazırlıq üzrə elan edilib.
Birinci lotla Dəvəçi rayonunun Güləmli kəndində qaçqınlar üçün 70 evin tikiləcəyi qəsəbənin inşası, ikinci lotla isə Bakı-Quba və Dəvəçi-Quba yollarının yuxarı və aşağı barrajlarında yolların tikintisi nəzərdə tutulur.
Tenderdə iştirak etməkdə maraqlı olanlar sənədlərini cari ilin noyabrın 1-nə kimi təqdim etməlidirlər. Təkliflər paketi isə noyabrın 2-də agentlikdə açılacaq.
