Sentyabrın sonlarında BMT-nin Ərzaq və Kənd Təsərrüfatı Təşkilatının (Food and Agriculture Organization of the United Nations - FAO) nümayəndə heyətinin Bakıya səfəri gözlənilir. Kənd Təsərrüfatı Nazirliyindən Trend ə verilən məlumata görə, nümaynədələrin səfərində əsas məqsəd fermer təsərrüfatlarında informasiya və monitorinq sistemlərinin təşkilinə yeni texniki yardım layihəsi üzrə nəzərdə tutulan tədbirlərin həyata keçirilməsidir.
Nazirlikdən qeyd ediblər ki, iyul ayında reallaşdırılmağa başlanmalı olan layihə bir sıra səbəblər üzündən yubanıb. Layihənin dəyəri 276 min dollar təşkil edir və o, 2005-ci ilin sentyabrından 2006-cı ilin noyabrına kimi həyata keçiriləcək.
Layihənin əsas məqsədi fermer təsərrüfatlarının səmərəli fəaliyyətini qiymətləndirməkdən, eləcə də yuxarıda göstərilən obyektlərdə keçirilən tədbirlər üzrə informasiyaların daxil edilməsi üçün məlumat bazasının yaradılmasından ibarətdir.
Bundan əlavə, bir az əvvəl Bakıda səfərdə olan təşkilatın baş direktoru Jak Dyufun qeyd etdiyi kimi, yaxın perspektivdə təşkilatın Azərbaycanda nümayəndəlik açacağı gözlənilir.
Əsası 1945-ci il aprelin 29-da qoyulan BMT-nin Ərzaq və Kənd Təsərrüfatı Təşkilatı (FAO - FAO) BMT-nin ilk ixtisaslaşmış idarəsidir. Təşkilatın 150-dən artıq üzvü var. Onun məqsədi kənd təsərrüfatı sahəsində, ərzaq məhsullarının, meşə və balıq emalı sənayesi mallarının hazırlanmasına texniki yardım etməkdən ibarətdir. Təşkilatın mənzil-qərargahı Romada yerləşir.