Ölkədə ən böyük yerli sığorta şirkəti olan Beynəlxalq Sığorta Şirkəti (BSŞ) bu ilin 9 ayı ərzində 16,218 milyard manat (3,5 milyon dollar) sığorta haqqı yığıbdır. Bu barədə şirkətin müşahidə şurasının sədri Xəyal Məmmədxanlı Trend xəbər agentliyinə müsahibəsində bildirdi. Onun sözlərinə görə, daxil olan sığorta haqlarının 15,8 milyard manatı könüllü, 418 milyon manatı isə icbari sığortanın payına düşüb. Könüllü sığorta haqları əsasən qəza, yanğın, tibbi və s. sığorta növləri üzrə toplanıb. Hesabat dövründə sığorta olunanlara baş vermiş sığorta hadisələri (qəza, yanğın, tibbi və s.) üzrə isə 3,060 milyard manat (665 min dollar) sığorta ödənişi verilibdir.
Qeyd edək ki, BSŞ 2002-ci ildə Azərbaycan Beynəlxalq Bankı (ABB) tərəfindən təsis edilib. Şirkətin nizamnamə kapitalının həcmi 5 milyon dollar təşkil edir və 28 sığorta növü üzrə müştərilərə xidmət göstərir. Hazırda BSŞ İsveçrədə fəaliyyət göstərən "İnterprotect" və yerli "Azal" sığorta şirkətlərində paya malikdir.
