Azərbaycan hökumətilə danışıqlar aparmaq məqsədilə Almaniyanın KfW yenidənqurma bankının su təchizatı və səhiyyə setorunun rəhbəri doktor Kurt fon Rabenaunun Bakıya birgünlük səfəri başlayıb. Bu barədə Trend ə bankın Bakı ofisinin rəhbəri Natiq Abdullayev məlumat verib. O, Bakıya Gəncə və Şəkidə su şəbəkələrinin yenidən qurulması layihəsi ilə bağlı müzakirələrin başa çatdırılması məqsədilə gəlib.
Almaniya bankı itkiləri layihənin həyata keçiriləcəyi 5 il ərzində büdcənin hesabına kompensasiya etməyi təklif edir.
Gələcəkdə bu şəbəkələr xarici menecerlər tərəfindən idarə olunacağından Maliyyə Nazirliyi dotasiyanın verilməsi təklifilə razılaşmır. Maliyyəçilər bu məsələnin həlli variantı kimi Gəncə və Şəkidə istifadə edilən suya görə yığımın və tariflərin artırılmasını təklif edir. Bakıda 1m2 suya görə əhali 320 manata ödədiyi halda, regionlarda bu rəqəm 100 manatdır. Bu tədbirlərin həyata keçirilməsi su şəbəkələrinə itkilərin yerini doldurmağa imkan verəcək.
Danışıqlar zamanı Gəncə və Şəkinin su şəbəkələrinə dövriyyə vəsaitlərinin ayrılması məsələsi razılaşdırılmayıb. Bank hər iki şəbəkəyə 1,250 mln avro ayırmağı və bunun ölkə hökumətilə imzalanacaq sənədlərdə göstərilməsini məqsədəuyğun hesab edir. Lakin MN ayrılacaq məbləğin sənədlərdə əks olunması təklifilə razılaşmır. Dövriyyə vəsaitlərinin hökumətin layihədəki payından ayrılması nəzərdə tutulub və maliyyəçilər bunun hər il tələbat olduqda ayrılacağı qənaətindədir.
2005-ci ilin sonuna kimi İmişli su şbəkəsinin yenidən qurulması üzrə birinci layihədən yığılmış 11 mln avro məbləğində kreditin alınması üçün Azərbacan hökuməti, KFW və SECO dövlət katibliyi arasında bütün müqavilələr imzalanmalıdır. Qalıq vəsaitləri üzrə öhdəliklər 31 dekabr 2005-ci il tarixində qüvvədən düşür.
İlk 5 ildə layihənin həyata keçirilməsi üçün tələb olunan 54 mln avro vəsaitin 37 milyonu KFW bankı, 10 mln avro məbləğində qrant isə İsveçrənin SECO təşkilatı tərəfindən ayrılacaq. Bütövlükdə, layihənin texniki-iqtisadi əsaslandırılmasına 80-100 mln avro tələb olunur. Yerdə qalan vəsait isə şəbəkə operatorları tərəfindən ayrılacaq.