Avropa yenidənqurma və inkişaf bankı (AYİB) Azərbaycanda yol layihələrinin, o cümlədən Bakı dairəvi avtomobil yolunun çəkilməsi layihəsinin gerçəkləşdirilməsinə vəsait ayrılmasını davam etdirməyə hazırdır. Bunun üçün ölkə hökuməti müvafiq layihələri AYİB-ə baxılmaq üçün təqdim etməlidir. Trend in məlumatına görə, bu barədə AYİB-in Azərbaycandakı nümayəndəliyinin rəhbəri Reymond Konvey bildirib.
Hazırda Avropa bankı Azərbaycan ərazisində iki avtomobil yolu layihəsini maliyyələşdirir. Bunlardan biri Bakı-Samur (Rusiya sərhədi) avtomobil magistralının bir hissəsinin yenidən qurulması layihəsidir. Avropa bankının kreditinin məbləği $100 mln. təşkil edir. Bu kredit dövlət zəmanəti ilə standart şərtlərlə ayrılır. Bu vəsaitlər yolun 28 -89 km.-də yolun yenidən qurulmasına sərf olunacaq. Ümumi uzunluğu 208 km olan yolun qalan hissəsi Çexiyanın $180 mln. həcmində kredit təqdim edən "Eksimbank"ının vəsaiti hesabına yenidən qurulacaq. Çexiya bankının krediti sindikatlaşdırılıb.Vəsaitin ümumi həcmindən $102 mln. "Eksimbank" və $78 mln. Fransanın BNP Paribas bankı tərəfindən təqdim edilib. Kredit 4 illik güzəşt və Libor+0,6% faiz dərəcəsi ilə 15 il müddətinə verilib.
İkinci kredit Hacıqabul- Kürdəmir avtomobil yolunun yenidən qurulması üçün təqdim edilib.Bu kreditin həcmi $41 mln. təşkil edir. Layihənin gerçəkləşdirilməsi zamanı ümumi uzunluğu 85 km olan yolun 3,5 km saşəsi (birinci dərəcə- dörd zolaqlı) yenidən inşa ediləcək. Magistralın qalan hisssəsi yenidən qurulacaq. Bu, ikinci dərəcəli, iki zolaqdan ibarət yol olacaq. Yolun yenidən qurulması layihəsinin gerçəkləşdirilmə müddəti iki ildir.