Nazirlər Kabineti tərəfindən "Azəristiliktəchizat" səhmdar cəmiyyəti haqqında təsdiqlənmiş Əsasnaməyə uyğun olaraq onun nizamnamə kapitalı 96,33 mlrd köhnə manat həcmindədir. Bu barədə Trend ə hökumətdən məlumat verilib. Hər səhmin nominal dəyəri 100 000 manatdır. Cəmiyyətin nizamnamə kapitalının artırılması və ya azaldılması Mülki Məcəlləyə uyğun olaraq həyata keçirilə bilər.
Cəmiyyətin əmlakı səhmdarların vəsaitindən, istilik enerjisinin istehsalından və satışından əldə olunmuş gəlirdən, kreditlərdən, əmlaka qoyulmuş sərmayələrdən, qiymətli kağızlardan və qanunvericiliklə qadağan olunmayan digər mənbələrdən təşkil oluna bilər.
"Azəristilik" SC-nin strukturuna əsasən, idarə heyəti sədr və iki müavindən ibarətdir. Müavinlər Nazirlər Kabinetinin qərarı ilə bu vəzifəyə təyin olunur və vəzifədən uzaqlaşdırılır. Müşahidə Şurası Energetika və Sənaye, Maliyyə nazirlikləri, Dövlət Əmlakının İdarə edilməsi üzrə dövlət komitəsi, Dövlət Memarlıq və İnşaat komitəsi və Bakı şəhər İcra Hakimiyyətinin nümayəndələrindənformalaşdırılır.