Azərbaycana "quş qripi" virusunun aşkar edilməsi üzrə aparılmış monitorinqlər zamanı toplanmış nümunələrin təhlilləri üçün laboratoriya avadanlığı gətirilib. Trend bildirir ki, yanvarın 31-də kənd təsərrüfatı nazirliyi yanında Dövlət Baytarlıq Xidmətinin rəhbəri İsmayıl Həsənov bu barədə məlumat verib.
Onun sözlərinə görə, yeni avadanlıq artıq quraşdırılıb və fevralın 6-dan 11-dək Xidmətin laboratoriyasının direktoru Elman Aslanov bu avadanlığın fəaliyyət prinsiplərinin öyrənilməsi üçün Rusiyada olacaq. Avadanlıq Dövlət Neft Fondunun $100 min məbləğində vəsaiti hesabına alınıb.
Bundan başqa, Xidmət rəhbərinin sözlərinə görə, bu həftə monitorinqlər zamanı toplanmış bütün nümunələr ABŞ-ın Azərbaycandakı səfirliyinin təşəbbüsü ilə Londona təkrar təhlil üçün göndəriləcək.
