BMT-nin Ərzaq və Kənd Təsərrüfatı təşkilatının (FAO- Food and Agriculture Organization of the United Nations) tərkibinə TİKA və Asiya İnkişaf Bankının nümayəndələrinin də daxil olduğu nümayəndə heyəti fevralın 6-dan başlayaraq bir həftə ərzində Azərbaycanın bir sıra regionlarına səfər edəcək. Kənd təsərrüfatı nazirliyindən Trend ə verilən məlumata görə, fevralın 6-7-də mütəxəssislər ölkənin Şimal rayonlarına, ayın 8-9-da isə İsmayıllı, Şamaxı və digər rayonlara səfər edəcək. Səfərlərin yekunu üzrə aqrar sektorun birgə layihələrin həyata keçirilməsi zərurətinin olduğu bir sıra sahələrinin vəziyyətinə dair hesabatlar hazırlanacaq.
Nazirlikdən o da bildirilib ki, regionlara səfər Cənub əməkdaşlığı proqramı çərçivəsində milli ərzaq təhlükəsizliyi proqramı üzrə hazırlıq işləri ilə bağlı həyata keçirilir. Layihənin hazırlanmasına azərbaycanlı mütəxəssislər də cəlb olunub.
Azərbaycan Kənd təsərrüfatı nazirliyinin simasında "Kənd təsərrüfatı məhsullarının rəqabət qabiliyyətinin artırılması və Azərbaycanda marketinqin təşkili", "Ərzaq təhlükəsizliyi" və "İpəkçilik sahəsinin inkişafı" layihələrini təsdiqlənmək üçün FAO-ya təqdim edib.
Təşkilat öz növbəsində Azərbaycanda perspektivli layihələrin həyata keçirilməsinə donor təşkilatların cəlb olunması istiqamətində işlərin həyata keçirilməsinə yardım etmək niyyətindədir.