Beynəlxalq Maliyyə Korporasiyası Azərbaycanda lizinq fəaliyyətinin inkişafına texniki yardım layihəsinin reallaşdırılması müddətinin daha bir il uzadılması təklifi ilə İsveçrənin iqtisadi məsələlər üzrə dövlət katibliyinə müraciət edib. Trend in Seconun nümayəndəsi Thomas Meyerin məlumatına istinadən xəbər verdiyi kimi, əsas məqsəd qanunvericilik əsaslarının işlənib hazırlanmasının davam etdirilməsi və layihə tərəfindən həyata keçirilən səlahiyyətlərin Lizinq Şirkətləri Assosiasiyasına verilməsidir.
Bu o deməkdir ki, BMK Lizinq Assosiasiyası tərəfindən lizinq şirkətləri üçün tədbirlərin keçirilməsi və s. məsələlərdə texniki yardım göstərəcək.
Onun sözlərinə görə, lizinqin maliyyələşməsi layihəsi 7 mln İsveçrə frankı dəyərində iri layihənin bir hissəsidir. Bu məbləğ proqramda iştirak edən maliyyə təşkilatlarına orta və kiçik müəssisələrin lizinq xidmətlərini maliyyələşdirmək üçün veriləcək. Layihə lizinqin inkişafına mane olan normativ-hüquqi maneələri aradan qaldırmaqla işgüzar mühitin yaxşılaşmasına yönəldilib. Təşkilati səviyyədə isə əsas məqsəd ayrı-ayrı maliyy ə təşkilatları daxilində sistemi möhkəmləndirməkdən və maddi-texniki baza yaratmaqdan ibarətdir.
Seco-nun əməliyyatlar üzrə baş meneceri Randol Petersenin sözlərinə görə, layihənin reallaşdırılması ərzində şirkətlərin sayı 3-4-dən 18-ə qədər, dövriyyə isə $500 mindən $26 mln-dək artıb. Onun proqnozlarına görə, 5-6 il ərzində regionda lizinq bazarının həcmi $500 mln-dək artacaq.