10-12 gün ərzində Azərbaycanın Maliyyə nazirliyi dövlət vəsaitlərinin xərclənməsinə nəzarətin gücləndirilməsi proqramının təsdiqinə dair prezident fərmanının layihəsini imzalanması üçün prezident administrasiyasına təqdim edəcək. Trend in maliyyə naziri Əvəz Ələkbərova istinadən xəbər verdiyi kimi, proqramda "Dövlət maliyyə nəzarətinin təkmilləşdirilməsi və tətbiqi haqqında" qanun layihəsinin Dünya bankı ilə razılaşdırıldıqdan sonra parlamentə verilməsi, struktur dəyişikliklərin və regionlarda nəzarət-təftiş idarələri və ya strukturlarının yaradılması nəzərdə tutulur. Bu proses 10-12 maliyyə idarəsində həyata keçiriləcək.
Layihədə göstərildiyi kimi, hər ilin yanvar ayında Maliyyə naziri müəssisələrin siyahısı və nazirlik tərəfindən aparılmış yoxlamaların qrafikini açıqlamaq niyyətindədir. Veb-saytda isə bu təftişlərin nəticələri haqqında məlumatlar yerləşdiriləcək.
Eyni zamanda dövlət satınalmaları üzrə işlərin təkmilləşdirilməsi də nəzərdə tutulur. Bununla əlaqədar "Dövlət satınalmaları haqqında" qanuna dəyişikliklərin edilməsi təklif olunur. "Biz tenderlərin keçirilməsi prosesindən narazıyıq, problemlər qalmaqdadır və onlar süni xarakter daşıyır", - deyə nazir qeyd edib. Fərmana, həmçinin, Hesablama Palatasının fəaliyyəti ilə bağlı bəndlər də daxil edilib. "Biz birgə fəaliyyətə üstünlük veririk, lakin HP-nin öz yoxlama qrafiki var. Bizim bu istiqamətdə görüləsi çox işimiz var. Bundan başqa nəzarət-təftiş fəaliyyəti ilə məşğul olan heyət kiçik olduğundan əməkdaşların sayı çoxalmalıdır. Heyət attestasiya vasitəsilə formalaşacaq, çünki əməkdaşların peşəkar səviyyəsi yüksək olmalıdır", - deyə Ə.Ələkbərov bildirib.
İlkin məlumatlara əsasən, dövlət şirkətləri və konsernlərinə nəzarət HP tərəfindən həyata keçiriləcək.
Nazir hesab edir ki, bu fərmanla büdcə xərclərinə ciddi nəzarət müəyyən ediləcək.
