Bakı şəhəri Vergilər Departamentinin Audit idarəsi tərəfindən departamentin 3 saylı filialında vergi ödəyicisi kimi qeydiyyatda olan RAİNKO LTD-də növbədənkənar səyyar vergi yoxlaması aparılıb. Bu barədə "Trendə" Vergilər Nazirliyinin İctimaiyyətlə Əlaqələr Şöbəsindən məlumat veriblər.
Yoxlama zamanı müəyyən edilib ki, həmin təşkilatın rəhbərliyi tərəfindən 2004-cü ilin oktyabr, noyabr, dekabr və 2005-ci ilin yanvar, fevral ayları üzrə aparılan əməliyyatlara dair vergi orqanlarına müvafiq bəyannamə təqdim edilməyib və beləliklə, də külli miqdarda vəsait dövlət büdcəsinə ödənilməkdən yayındırılıb.
Yoxlama nəticəsində aşkar edilmiş faktlar aidiyyatı üzrə Vergilər nazirliyi yanında Vergi Cinayətlərinin İbtidai araşdırılması Departamentinə göndərilib və fakt üzrə 2005-ci ilin oktyabrın 15-də Cinayət Məcəlləsinin 213.4-cü maddəsinə əsasən cinayət işi başlanılıb.
İstintaq nəticəsində müəyyən edilib ki, RAİNKO LTD-nin direktoru Eldar Hüseynoğlu tərəfindən aparılmış əməliyyatlara dair vergi orqanına hesabat təqdim edilmədiyi üçün 2004-cü il ərzində 111485,7 AZN əlavə dəyər vergisinin və həmin ilin yekununa görə 2810,2 AZN mənfəət vergisinin, 2005-ci ildə 165771,7 AZN ƏDV-nin, ümumiilikdə isə 277538,4 AZN-nin dövlət büdcəsinə ödənilməsi şirkət rəhbərliyi tərəfindən yayındırılıb.
Əməliyyat tədbirləri nəticəsində fevralın 14-də E.Hüseynoğlu yaxalanaraq Departamentin istintaq şöbəsinə təhvil verilib, fevralın 15-də isə ona CM-nin 213.4-cü maddəsilə ittiham elan olunub.
Fevralın 16-da VCİAD tərəfindən Eldar Hüseynoğlu barəsində həbs qətimkan tədbirinin seçilməsi ilə bağlı Baş prokurorluq qarşısında vəsatət qaldırılıb.
Trend-in ən mühüm və maraqlı xəbərlərini "Telegram"da izləyin
