Azərbaycan hökuməti dövlət büdcəsinə valyuta daxilolmalarının konvertasiyası zamanı əmələ gəlmiş xərclərin yerinin doldurulmasına dair hələ qəti qərar qəbul etməyib. Bu barədə Trend ə AMB-nin idarə heyəti sədrinin birinci müavini Alim Quliyev məlumat verib. Onun sözlərinə görə, AMB bu məqsədlə dövlət büdcəsinin vəsaitlərinin qabaqcadan nəzərə alınması təklifini irəli sürüb.
Əvvəllər AMB vəsaitlərin birbaşa kovertasiyasını həyata keçirirdi. Lakin indiki monetar siyasət şəraitində və məzənnənin dəyişməsi ilə əlaqədar valyuta ehtiyatları müəyyən riskə məruz qaldığından bu məqsədəuyğun deyil. "Beynəlxalq təcrübədə belə qəbul olunub ki, həm xərclər, həm də gəlirlər nəzərə alınmalıdır. Buna görə də onların dövlət büdcəsinə daxil edilməsi məqsədəuyğundur", - deyə A.Quliyev qeyd edib. Məsələnin müsbət həll olunacağı təqdirdə konvertasiya xərcləri ehtiyat fondunun vəsaitləri hesabına ödənilə bilər.
Məhz konvertasiya xərcləri üzrə öhdəliklərlə bağlı məsələnin həll olunmaması ilə əlaqədar AMB dövlət büdcəsinə valyuta daxilolmalarının konvertasiyasını müvəqqəti olaraq dayandırıb. Məlumdur ki, xəzinəyə vergi tutulmalarını neft şirkətləri və ümumiyyətlə, neft müqavilələrinə cəlb olunmuş subpodratçılar xarici valyuta ilə həyata keçirir. Bu prosesi müqavilələr bağlamaqla reallaşdırmaq mümkündür. Lakin ilin sonunda AMB $113 mln, o cümlədən 15 mln funt/sterlinqin konvertasiyasını həyata keçirib.