2006-cı ilin ikinci rübünün sonunadək Azərbaycan və Rusiya hökumətləri arasında AR-in RF-də və RF-nin AR-də diplomatik nümayəndələrinin yerləşdirilməsi və xidmət şərtləri haqqında Saziş layihəsi hazırlanacaq və razılaşdırılacaq. "Azərbaycan-Rusiya hökumətlərarası komissiyasında belə bir qərara gəlinib ki, iki ölkə arasındakı bu məsələlər saziş əsasında həyata keçirilsin və əmlak məsələləri tamamilə başa çatdırılsın. Bu, AR-in RF-də olan əmlakının hansı formada və istiqamətlərdə idarə oluna bilməsinin yaxud Rusiya tərəfinin AR-də olan əmlakının hansı formada həll edilməli olması ilə bağlı tələbinin müəyyənləşdirilməsinə imkan verəcək". Trend bildirir ki, bu fikri komissiyanın həmsədri, Azərbaycan baş nazirinin birinci müavini Abbas Abbasov bəyan edib.
Qeyd edək ki, Rusiyada AR-in səfirliyinin yerləşdiyi Leontyevski dön., ev16, Qoqolevski bulvar, ev 31A və Voznesenski dön., ev15 ünvanlarında olan binalara AR-in əmlak hüququnun rəsmiləşdirilməsi məsələsi uzun illərdir tənzimlənməyib. A.Abbasov hesab edir ki, qanunvericiliyə müvafiq olaraq və hüquqi bazaya əsaslanaraq hökumət məsələnin həlli üçün məhkəməyə müraciət edə bilər yaxud məsələni digər üsullarla həll edə bilər. Bunlardan biri sazişin hazırlanması olaraq seçilib.
Baş nazirin müavini qeyd edib ki, neft-qaz infrastrukturu sahəsində Azərbaycanın əmlakı ilə bağlı mübahisə analoji yolla həll ediləcək.