Bakı Fond Birjası dövlət müəssisələrinin səhmlərinin özəlləşdirilməsi zamanı ilkin bazar kimi çıxış edə bilər. Dövlət əmlakının idarə olunması üzrə Dövlət Komitəsinin sədri Kərəm Həsənovun Trend ə verdiyi məlumata görə, fond bazarı vasitəsilə iştirakçılar gəlir əldə etmək məqsədilə səhmlərlə alqı-satqı aparırlar və bu zaman onları müəssisənin gələcək inkişafı, yeni iş yerlərinin açılması çox az maraqlandırır. Halbuki özəlləşdirilmiş müəssisəyə investisiyaların qoyulması hər şeydən çox lazımdır.
"Yeni iş yerlərinin yaradılması, əhalinin daha geniş kütləsinin həyat şəraitinin yaxşılaşdırılması ilə bağlı qarşımıza qoyduğumuz vəzifələrin həlli investisiyalardan asılıdır. Bununla əlaqədar, özəlləşdirilməmiş müəssisələrin səhmlərinin BFB vasitəsilə satışı perspektivli hesab edilə bilməz", -deyə K.Həsənov bildirib.
Bundan əlavə, Dövlət Komitəsi özəlləşdirmə qanunvericiliyi əsasında SC səhmlərinin satışı mexanizminin təkmilləşdirilməsi üzrə konkret təkliflər hazırlayıb.
Dövlət Komitəsinin sədri ikinci bazardan istifadə edilməsini sərfəli hesab edir və məhz səhmlərin BFB vasitəsilə yerləşdirilməsində iri şirkətlər, banklar və birgə müəssisələr məşğul ola bilərlər.
Hazırda dövlət müəssisələrinin özəlləşdirmə səhmləri Hərrac Mərkəzi vasitəsilə ixtisaslaşdırılmış hərraclarla həyata keçirilir. Özəlləşdirmə dövlət müəssisəsinin mülkiyyətinin dəyişdirilməsi, eləcə də dövlət büdcəsinə gəlirlərin daxil olmasını nəzərdə tutur. Hazırki halda, elə alıcı cəlb olunmalıdır ki, o, müəssisənin əmək kollektivinin hüquqlarını müdafiə etməklə yanaşı, müəssisəni bərpa etmək və yeni iş yerlərinin yaradılması imkanlarına da malik olmalıdır.
