Martın 15-də Türkiyə tərəfi Qars-Axalkalaki-Tbilisi-Bakı (QATB) dəmir yolunun açılışı layihəsinin texniki-iqtisadi əsaslandırılmasının (TİƏ) son variantını təqdim edib. Bu barədə Trend ə Azərbaycanın nəqliyyat nazirinin müavini Musa Pənahov bildirib. Layihəyə Türkiyə ərazisində marşrutla bağlı bəzi texniki dəyişikliklər edilib.
Nazir müavini qeyd edib ki, 2006-cı il martın sonunda Azərbaycan, Gürcüstan və Türkiyə üçtərəfli ekspert qrupunun görüşü gözlənilir. Bu görüşdə layihənin TİƏ-nin son variantının müzakirəsi və qəbul edilməsi nəzərdə tutulur. Bu il mayın əvvəlində Türkiyənin təklifi ilə üç ölkənin nəqliyyat nazirlərinin görüşü planlaşdırılır. TİƏ-nin hazırlanması ilə Türkiyənin Yüksel Domonik şirkəti məşğul olur.
QATB dəmir yolu marşrutunun açılış layihəsinin ilkin ümumi dəyəri infrastrukturun inşası və yenidənqurması nəzərə alınmaqla $400 mln. təşkil edir. Yolun uzunluğu 98 km. təşkil edir, bundan 30 km.sahə Gürcüstanın, 68 km. isə Türkiyənin payına düşür.
