Alümin sənayesinin inkişafı üçün qoyulacaq sərmayələr Hollandiyanın Fondel Metall CS-i tərəfindən bu sahəyə qoyulmuş vasaitini üstələyəcək. Trend agentliyinin məlumatına əsasən, bu haqda jurnalistlərə Dövlət Əmlakının İdarə Olunması üzrə Dövlət Komitəsiin sədri Kərəm Həsənov bildirib.
Dövlət Komitəsi "Azəralümin" CS-nin dövlət balansına keçirilməsi ilə əlaqədar onun fəaliyyətinin inkişafı və səmərəli təşkili üzrə təkliflər hazırlayır.
Belə bir zərurət Fondel Metall-la idarəçilik haqqında sazişin pozulmasından sonra yaranıb. Belə ki, şirkət üç il ərzində $202 mln əvəzinə cəmi $48 mln. sərmayə qoyub. Hazırda müstəqil auditorlar "Azəralümin" CS-yə qoyulmuş sərmayələrin real həcmini araşdırır. Müqavilənin imzalanmasından kifayət qədər vaxt keçsə də, Daşkəsən alümin yatağı hələ də fəaliyyət göstərmir.