Trend agentliyinin Beynəlxalq Valyuta Fondunun Yaxın Şərq və Mərkəzi Asiya Departementinin direktor müavini Vitaliy Kramarenkoya istinadən yaydığı məlumata əsasən, Azərbaycanın Milli Bankı ilə hökumət bank bazarında qeyri-bərabərliyi azaltmaq üçün tədbirlər görür.
Onun fikrincə, Azərbaycandakı bank sistemi kiçikdir və monetizasiya səviyyəsinə görə Rusiya, Ukrayna və Estoniya bank sektorlarından geri qalır. Bununla əlaqədar Milli Bank pul-kredit siyasətinin tənzimlənməsi, bankların konsolidasiyası və bank bazarında rəqabət mühitinin yaradılmasına böyük diqqət ayırmalıdır.
Aprelin 19-da başa çatacaq səfər zamanı BVF missiyası Beynəlxalq Bank, Azəriqazbank və Bank of Baku-da görüşlər keçirib. V.Kramarenko bank sektorunu maliyyə sistemində vacib element hesab edir, onun fikrincə, bu sahədəki dəyişikliklərdən xəbərdar olmaq lazımdır. Bundan əlavə, Fondun rəhbərliyi və üzvləri dialoqda maraqlıdır.
Görüşün yekunları üzrə V.Kramarenko belə bir nəticəyə gəlib ki, ölkənin bank sektorunda qeyri-bərabər şərait yaradılıb və bu özünü dövlət banklarındakı əmanətlərə dövlət tərəfindən zəmanətin verilməsində göstərir. Halbuki, kommersiya bankları belə bir imkandan məhrumdur.
O hesab edir ki, əmanətlərin sığortalanması haqqında qanunun qəbulu həmin bərabərsizliyi aradan qaldırmağa imkan verəcək. Bundan əlavə, Milli Bank dövlət müəssisələrini başqa banklara da vəsait qoymağa təşviq etməlidir.
