Azərbaycan Xəzər Dəniz Gəmiçiliyi 12334 ton dedveytli "General Aslanov" tankerinin müasirləşdirilməsinə başlayıb. Bu barədə Trend ə Azərbaycan xəzər dəniz gəmiçiliyinin rəisi Aydın Bəşirov bildirib. Bu tanker, təhlükəsizlik üzrə beynəlxalq konvensiyaların tələb etdiyi kimi, ikinci bortla təchiz olunur.
Gəmiçilik analoji layihə üzrə tikilmiş "Şamxor" tankerini artıq ikinci bortla təchiz edib. Yaxın günlərdə analoji layihəli üçüncü tanker - "Qafur Məmmədov"da da müasirləşdirilmə işləri aparılacaq.
Gəmilərin müasirləşdirilməsi beynəlxalq dəniz təşkilatı (İMO) tərəfindən qəbul olunmuş konvensiyaya görə tələb olunur. Bu konvensiyaya əsasən, mümkün qəzalar nəticəsində yükün dənizə tökülməsinin qarşısının alınması üçün 12 min ton su tutumu olan bütün gəmilər 2007-ci ilin sonuna qədər ikinci bortla təmin olunmalıdır. Bir ədəd bu cür gəminin müasirləşdirilməsi üçün 600 min dollar məbləğində vəsait tələb olunur.
2009-cu ildə ikinci bortu olmayan 7 min ton yükqaldırma qabiliyyətinə malik gəmilərin nəql edilməsinə icazə verilməyəcək. Bu gün Xəzər dəniz gəmiçiliyinin balansında 9 ədəd bu cür gəmi var. Müasirləşdirilmiş gəmilər yeni gəmi sinfi ilə bərabər tutulacaq.
