Azərbaycan prezidentinin fərmanı ilə Azərbaycan Dövlət Neft Fondunun (ADNF) 2006-cı il büdcəsinə dəyişiklik və əlavələr qüvvəyə minib. Trend agentliyinin məlumatına görə, fondun büdcəsinin dəyişdirilməsi zərurəti istehsal və ixrac olunan xam neftin müqavilə qiymətilə ümumrespublika topdansatış qiyməti arasındakı fərqlə bağlı əlavə daxilolmalar, eləcə də Bakı-Tbilisi-Ceyhan neft boru kəməri layihəsinin bahalaşması ilə əlaqədar Azərbaycanın iştirak payının ödənilməsi nəticəsində yaranır.
Təsdiqlənmiş dəyişikliklərə əsasən, ADNF-nun gəlirləri 807 842,6 min manatdan 854 085,5 min manata qədər artıb. Xam netfin daxili və müqavilə qiymətləri arasındakı fərqlə bağlı əlavə daxilolmalar 46 242,9 min manat təşkil edəcək. Fondun xərcləri 954 287,7 min manatdan 1 026 287,7 min manata qədər artıb. ARDNŞ-nin BTC-dakı iştirak payının ödənilməsi üçün ADNF-dan əvvəlki 38 mln. manat əvəzinə 110 mln. manat ayrılacaq.