Milli Bankın açıqladığı ödəniş balansına əsasən, strateji xarici valyuta ehtiyatları 1,7% artaraq aprelin 1-nə 2 616 mln. ABŞ dolları (məzənnə fərqi nəzərə alınaraq) təşkil edib.
Trend agentliyinin məlumatına əsasən, burada Azərbaycan Dövlət Neft Fondu aktivlərinin payına 1463,5 mln. ABŞ dolları, Milli Bankın məcmu beynəlxalq aktivlərinin payına isə 1152,5 mln. ABŞ dolları düşüb. Eyni zamanda Milli Bankın ixtiyarında olan valyuta ehtiyatları 1026,6 mln. ABŞ dolları təşkil edib ki, bu da neft-qaz sektoru istisna olmaqla malların və xidmətlərin 4.4 aylıq idxalını maliyyələşdirməyə imkan verir. Bu, dünya təcrübəsində qəbul olunmuş beynəlxalq kifayətlilik meyarından da yüksəkdir.
Gəlirlər üzrə daxilolmaların və ödənişlərin ümumi dövriyyəsi 703.6 mln. ABŞ dolları məbləğində olmuşdur. Bunun 92.1%-ni (647.8 mln. ABŞ dolları) Azərbaycandan ödənişlər təşkil edir. Bu məbləğin isə əsas hissəsini (532.1 mln. ABŞ dolları) Azərbaycan Beynəlxalq Əməliyyat Şirkətinin xarici investorlarının payına düşən gəlirlərinin repatriasiyası (xam neft şəklində), qeyri-rezidentlərə ödənilmiş əmək haqları (34.7 mln. ABŞ dolları) və xarici kreditlərdən istifadəyə görə (neft-qaz
sektoru daxil olmaqla ) ödənilən faizlər (39.2 mln. ABŞ dolları) təşkil edir.
2006-cı ilin I rübü ərzində gəlirlərlə bağlı ölkəyə daxil olmuş vəsait 2005-ci ilin I rübü ilə müqayisədə bu göstərici 31.4% artaraq 55.8 mln. ABŞ dollarına bərabər olub. Bunun da 12.7 mln. ABŞ dolları Dövlət Neft Fondunun vəsaitlərinə, 10.2 mln. ABŞ dolları Milli Bankın sərəncamında olan xarici valyuta ehtiyatlarına və 1.8 mln. ABŞ dolları isə 2-ci pillə banklarının xaricdə yerləşdirilmiş aktivlərinə hesablanmış faizlər üzrə gəlirlərdir.
