"Siyasi partiyalar haqqında" qanun əlavə və dəyişikliklər edilməklə Milli Məclisin payız sesiyasında qəbul ediləcək. Bu barədə Trend ə Vətəndaş Birliyi Partiyasının (VBP) sədri, millət vəkili Sabir Hacıyev bildirib.
VBH sədri qeyd edib ki, 1992-ci ildə qəbul edilən "Siyasi partiyalar haqqında" qanun Azərbaycanın indiki reallıqları ilə üst-üstə düşmür: "Qanunda bir sıra boşluqlar var. Sənədə əlavə və dəyişikliklər edilməlidir. Xüsusilə də partiyaların dövlət tərəfindən maliyyələşdirilməsi məsələsi qəbul ediləcək qanunda öz əksini tapmalıdır".
Millət vəkili onu da bildirib ki, Azərbaycan qanunlarını dünya və Avropa standartlarına uyğunlaşdırır. Ona görə də bəzi qanunlar yenidən hazırlanmalı, bəzilərində isə müəyyən dəyişikliklər edilməlidir: "Siyasi partiyalar haqqında" qanunda siyasi partiyaların maliyyə mənbələrinin şəffaflığı, onların dövlət büdcəsindən maliyyələşməsi, fəaliyyətinə nəzarət və digər mühüm müddəalar əksini tapacaq".
