Dünya bankı "Azərbaycanın institusional quruluşuna texniki yardım" (İBTA-2) adlı ikinci layihəsinin reallaşma müddətinin iyunun 30-da bitməsi ilə bağlı Azərbaycan hökümətinə qəti cavab verib.
Layihənin reallaşma qrupundan Trend ə verilən xəbərə görə, Baş dövlət xəzinəsinin avtomatlaşdırma komponenti üzrə xəzinənin bölgə şöbələrində avadanlıqların quraşdırılmasının başa çatmaması ilə bağlı layihənin uzadılmasına ehtiyac yoxdur. Xəzinə üçün avadanlıqların alınması tamamilə ödənilib və avadanlıqlar çatdırılıb, indi bəzi bölgə şöbələrindəki təmir işləri başa çatdıqdan sonra onların quraşdırılma məsələsi qalır.
İBTA-2 layihəsinin 7,470 milyon SDR (10,6 milyon ABŞ dolları) məbləğində ümumi dəyərindən 5,1 milyon ABŞ dolları istifadə olunmayıb və bu məbləğ quş qripi ilə mübarizə üçün verilib.
İBTA-2 layihəsi 2002-ci ildə təsdiq olunub. Layihə əvvəllər nəzərdə tutulmuş 10 komponentdən cəmi 4 komponenti əhatə edib. Həyata keçirilənlər arasında - dövlət idarəetməsinin gücləndirilməsi, dövlətin maliyyə xərclərinə nəzarət, sosial xərclərin dəyişdirilməsi və layihənin idarə olunması, mühasibat uçotu və audit sahəsində qanunvericiliyin təkmilləşdirilməsi vasitəsilə institusional potensialın gücləndirlməsini qeyd etmək olar.