Bu ilin sonunadək TRACECA proqramının 2006-cı il üçün fəaliyyət planının təsdiqlənməsi planlaşdırılır. Bu planda 13,5 milyon avro məbləğində dörd layihənin həyata keçirilməsi nəzərdə tutulur. Bu barədə Trend ə TRACECA-nın Azərbaycan üzrə milli katibi Akif Mustafayev xəbər verib.
Bu vəsaitlər hesabına bütün TRACECA ölkələri: Mərkəzi Asiya, Qafqaz, Avropa hissəsi üçün loqistik mərkəz şəbəkələrinin yaradılma layihəsi (məbləği 5,5 milyon avrodur), Dəniz daşımalarının təhlükəsizliyi, Qara və Xəzər dənizlərində gəmilərin törətdiyi çirklənmənin aradan qaldırılması sahəsində təhlükəsizlik və əməkdaşlığın ümumi idarəetmə sisteminin inkişafı layihəsi (məbləği 3,5 milyon avrodur), Sahə administrasiyasının mülki aviasiya və sahə personalının ixtisasının artırılması və təlimi layihəsi (məbləği 2 milyon avrodur), Qara və Xəzər dənizlərində dəniz magistralları layihəsi (500 min avro məbləğində kompüter və kommunikasiya avadanlığının, limanların proqram təminatının alışı da daxil olmaqla) (məbləği 2,5 milyon avrodur) həyata keçiriləcək. Bütün layihələrin reallaşma müddəti 24 aydır.
Bu layihələrin reallaşması hələ Avropa komissiyası tərəfindən təsdiq olunmalıdır. Beləliklə, onların iki ildən tez reallaşması mümkün deyil. Hazırda 2003-cü ilin fəaliyyət planında nəzərdə tutulmuş layihələr həyata keçirilir.