Qars-Axalkalaki-Tbilisi-Bakı marşrutu üzrə dəmir yolunun açılış layihəsinin texniki-iqtisadi əsaslandırması üzrə qəti qərar iyulun 27-də Qazaxıstanda keçiriləcək görüşdə qəbul olunacaq. Bu barədə Trend ə Azərbaycan hökümətindən xəbər veriblər.
Bu vaxta qədər Gürcüstan TİƏ-nin hansı variantını qəbul edəcəyini müəyyənləşdirməli və lazım gələrsə, orada dəyişikliklər edilməlidir. Bundan sonra tərəflər bu nəqliyyat marşrutunun sonrakı inkişaf strukturu haqqında qərar qəbul edəcəklər.
Azərbaycanın Nəqliyyat Nazirliyində qeyd olunduğu kimi, Gürcüstan ehtiyat edir ki, Qars-Axalkalaki-Tbilisi-Bakı marşrutu üzrə dəmir yolunun açılışı ilə hazırda Gürcüstanın Qara dəniz limanları Poti və Batumiyə göndərilən yüklərin böyük hissəsi bu dəhlizə gedəcək. Lakin, Azərbaycan tərəfinin fikrincə, bu marşrutlar üzrə göndərilən yüklər müxətlif xarakterə malikdir. Hazırda Poti və Batumiyə əsasən neft və neft məhsulları göndərilir, Qars-Axalkalaki-Tbilisi-Bakı marşrutu üzrə isə əsasən quru yüklər nəql ediləcək. Gürcüstan və Qazaxıstan artıq bu nəqliyyat dəhlizi üzrə nəqli təmin edəcək protokolu imzalayıb.
Bundan başqa, gürcü tərəfi hesab edir ki, bu ölkənin dəmir yollarının bərpası layihənin türk şirkəti tərəfindən hazırlanmış texniki-iqtisadi əsaslandırılmasında öz əksini tapmayıb.
Qars-Axalkalaki-Tbilisi-Bakı dəmir yolu nəqliyyatı dəhlizinin yaradılma layihəsinə 98 km uzunluqlu Qars-Axalkalaki dəmir yolu qolunun tikintisi də daxildir. Bu qolun 68 km-i Türkiyə ərazisinin, 30 km-i isə Gürcüstan ərazisinin payına düşür. Həmçinin Axalkalaki-Tbilisi sahəsində də müəyyən yenidənqurma işləri aparmaq lazımdır. Layihənin orta qiyməti 400 mln. ABŞ dolları məbləğində dəyərləndirilir.
