...

Azərbaycan Milli Bankı ipoteka krediti üzrə dövlət güzəştlərinin verilməsi qaydalarının son variantını təqdim edib

Biznes və iqtisadiyyat xəbərləri Materials 31 İyul 2006 13:14 (UTC +04:00)

İpoteka krediti üzrə dövlət güzəştlərinin verilmə qaydalarının layihəsi ölkə prezidenti səviyyəsində təsdiq olunacaq. Bu barədə Trend ə Azərbaycan ipoteka fondunun icraçı direktoru Faiq Məmmədov xəbər verib.

Onun sözlərinə görə, əvvəlki prezident fərmanlarında mexanizm və kateqoriyaların işlənməsi haqqında sərəncamlar verilib, ona görə də ölkə höküməti tərəfindən müsbət baxılan layihələr üzrə konkret qərarlar qəti olaraq daha yüksək səviyyədə qəbul olunacaq.

Milli Bank artıq AMB və Gənclər və İdman Nazirliyi tərəfindən hazırlanmış qaydaların son variantını Nazirlər Kabinetinə təqdim edib. "Ümumi mexanizm əhalinin müəyyən aztəminatlı təbəqələri (gənc ailə və hərbi qulluqçu) üçün ipoteka krediti üzrə ödəniş yükünü asanlaşdırmağa yönəldilib", - deyə F.Məmmədov qeyd edib.

Bu qaydalar çərçivəsində ipoteka kreditinin ödənmə müddəti 15 ildən 25 ilə qədər artırılacaq və müvafiq olaraq kredit üzrə annuitet məbləğ azaldılacaq. Əgər hazırda kreditin rəsmiləşdirilməsi zamanı gələcək mənzilin dəyərinin 30%-ni ödəmək lazımdısa, o zaman gənc ailələr üçün bu məbləğ iki dəfə azalacaq. Kredit üzrə faiz dəyişməyəcək və ildə 12% səviyyəsində saxlanılacaq. Bununla yanaşı, güman edilir ki, dövlət ya ilkin ödənişin yarısını, ya da kreditin faiz xidmətinin yarısını öz üzərinə götürəcək.

Gənclər nazirliyinin ilkin hesablamalarına görə, respublikada həyat şəraitinin yaxşılaşdırılmasına ehtiyac duyan təxminən 50 min gənc ailə var, Müdafiə Nazirliyinin məlumatlarına görə isə, təxminən 25-30 min hərbi qulluqçu ailəsi var. "Ardıcıllıq müəyyən olunmalıdır, çünki hamını birdən əhatə etmək mümkün deyil. İqtisadiyyatın və əhalinin yaşam səviyyəsinin artmasına baxmayaraq, böyük maliyyə vəsaitləri tələb oluna bilər. Əgər 50 min gənc ailə varsa, orta hesabla, 1 mlrd. manat tələb olunur və bu, real deyil", - deyə F.Məmmədov hesab edir.

İlkin hesablamalara görə, bu il ipoteka üçün büdcə vəsaitlərinin artırılmasına ehtiyac olmayacaq, lakin bu, bütün ərizələrə nə qədər tez baxılacağından asılı olacaq.

2006-cı ildə bu məqsədlər üçün büdcədən 6 mln. manat ayrılıb, hazırda bunun 1 mln. manatdan çoxu istifadə olunub.

Xəbər lenti

Xəbər lenti