Azərbaycan hökuməti 2007-ci ildə milli valyutanın möhkəmləndirilməsi siyasətinin davam etdiriləcəyini bildirir. Hökumət mənbələrindən Trend ə verilən məlumata əsasən, dövlət büdcəsinin 2007-ci ilə olan proqnozunda dolların manata nisbətdə məzənnəsi 1 dollara görə 0,86 manat səviyyəsindədir, halbuki bu il üçün həmin göstərici 0,90 manata bərabərdir.
Bu proqnoz İqtisadi İnkişaf Nazirliyi tərəfindən hazırlanan makroiqtisadi göstəricilər çərçivəsində verilir, lakin valyutanın məzənnəsi Azərbaycan Milli Bankı və Dövlət Statistika Komitəsilə məsləhətləşmə nəticəsində müəyyənləşdirilir.
Bankda hesab edirlər ki, belə bir proqnozu gələn ilin dövlət büdcəsinə gözlənilən valyuta daxilolmaları ilə izah etmək olar. Son zamanlar valyuta gəlirlərinin artımı ilə əlaqədar milli valyutaya tələbat artıb. Bu da dolların məzənnəsinin aşağı düşməsinə gətirib çıxarır.
Manatın möhkəmlənməkdə olmasına baxmayaraq, Milli Bank valyuta bazarında destabilizasiyaya yol verməmək üçün sterilizasiya üzrə bütün lazımi tədbirləri görür, çünki bu inflyasiyanın artımına təsir göstərə bilər.
İlin əvvəlindən manatın 3,58% möhkəmlənməsi müşahidə olunur və bu gün dolların rəsmi məzənnəsi 0,8857 manat təşkil edir. AMB idarə heyəti sədrinin birinci müavini Alim Quliyevin sözlərinə görə, ilin sonuna qədər manat ikirəqəmli səiyyədə möhkəmlənə bilər ki, bu da neft-qaz layihələrindən böyük valyuta daxilolmaları ilə bağlıdır. Əvvəllər AMB dolların məzənnəsinin 6-8% ucuzlaşmasını proqnozlaşdırırdı.
