Sentyabrın 11-də Varşavada Azərbaycan-Polşa hökumətlərarası iqtisadi əməkdaşlıq komissiyasının ilk iclası keçiriləcək. Bu barədə Trend ə İqtisadi İnkişaf Nazirliyindən məlumat verilib.
Azərbaycan tərəfdən komissiyanın həmsədri iqtisadi inkişaf naziri Heydər Babayev, Polşa tərəfdən isə iqtisadiyyat naziri Pyotr Voznyak təyin olunub.
Bu, komissiyanın ilk iclası olduğundan onun çərçivəsində iqtisadi əməkdaşlıqla bağlı ümumi məsələlərə baxılması nəzərdə tutulur. Komissiyanın gündəliyinə iki ölkə sahibkarları arasında əlaqələrin (o cümlədən ticarət əlaqələrinin) inkişafı, investisiya imkanlarının genişləndirilməsinə dair məsələlər daxil edilib.
2006-cı ilin I yarısının yekunlarına görə, Polşadan Azərbaycana $8 796,3 min məbləğində mal idxal olunub. Respublikadan Polşaya ixracın həcmi isə $2 930,6 min təşkil edib. Ötən ilin analoji dövrü ilə müqayisədə idxal əməliyyatları 3,6%, ixrac əməliyyatları isə 5,8% artıb. Mal dövriyyəsinin ümumi artım həcmi 4,1% olub. İki ölkə arasında xarici ticarət dövriyyəsində mənfi saldo $5865,7 min təşkil edib.
