Azərbaycanın Maliyyə Nazirliyi ölkədə fəaliyyət göstərən sığorta şirkətləri üçün minimum tələblərin artırılması qrafikini 2006-cı ilin sonunadək elan etməyə hazırlaşır. Nazirliyin dövlət sığorta nəzarəti şöbəsinin yeni başçsısı Namiq Xəlilovun Trend ə verdiyi məlumata görə, yeni qrafik 2007-ci ilin II yarısından işləyəcək.
""Sığorta haqqında" yeni qanun qəbul edildikdən sonra nizamnamə kapitalına tələbin artırılması üzrə ümumi anlayış var və iqtisadiyyatda sürətli artım templərini nəzərə alaraq mövcud qrafik hazırkı gerçəkliklərə cavab vermir. Buna görə də qrafikə ciddi dəyişikliklərin ediləcəyi gözlənilir", - deyə N.Xəlilov qeyd edib. O, sığorta bazarının ümumi iqtisadi inkişafla ayaqlaşa bilməməsi faktını istisna etməyib. 2006-cı ilin I yarısında sığorta bazarı 0,96%, ÜDM isə 36,3% artıb.
Bu yaxınlarda maliyyə naziri Samir Şərifov bəyan edib ki, sığorta təşkilatlarının nizamnamə kapitallarına qarşı yeni tələblər 3 illik dövrü əhatə edəcək. Sığorta şirkətlərində nizamnamə kapitallarının artırılması proqramına əsasən, 2010-cu ildə səviyyə 1 mln manata çatdırılmalıdır.
N.Xəlilovun sözlərinə görə, bu müddətlər irəli çəkiləcək. Ancaq konkret olaraq nə qədər irəli çəkiləcəyi nazirlikdə müzakirə olunacaq. Doğrudur, o hesab edir ki, böyük uyğunsuzluq oluduğundan onları bu gün banklara qarşı sürülən tələblərə yaxınlaşdırmaq mümkün olmayacaq. Bunun üçün sığortaçılara vaxt vermək lazımdır. Banklarda tələblər 1 iyul 2007-ci ildə hər bir bankda 10 mln manat təşkil etməli olan məcmu kapitala qarşı qoyulur.
1 iyul 2006-cı ilə olan vəziyyət üzrə Azərbaycanda fəaliyyət göstərən 28 sığorta şirkətinin məcmu kapitalı 35,89 mln manat təşkil edib. 2005-ci ilin analoji dövrü ilə müqayisədə artım 41,7% (10,56 mln manat) təşkil edib. Bu gün ən iri nizamnamə kapitalına Beynəlxalq Sığorta şirkəti, Standard Insurance, MBASK, Xalq Sıgorta malikdir.