2006-cı il ərzində Azərbaycan Dövlət Neft Şirkəti müxtəlif növ vergi üzrə dövlət bücəsinə 866 mln. manat ödəmək niyyətindədir. Bu göstərici keçən ildəki daxilolmaların həcmi ilə müqayisədə 59,2% çoxdur.
Trend in xəbər verdiyi kimi, ARDNŞ-in vitse-prezidenti Şahin Mustafayev "Vergilər" qəzetinə bildirib ki, cari ilin birinci yarısında büdcəyə artıq 352,8 mln. manat köçürülüb.
Keçən il daxilolmalar 544 mln. manat, 2004-cü ildə 384,4 mln. manat, 2003-cü ildə 370,6 mln. manat, 2002-ci ildə 332 mln. manat təşkil edib. 2001-ci ildə isə dövlət xəzinəsinə 267,3 mln. manat köçürülüb. Qeyd edək ki, 2001-ci ilin yanvar ayının 1-nə olan vəziyyətə görə, ARDNŞ-in vergi borcu 695,8 mln. manat təşkil edib.
Ş. Mustafayevin fikrincə, ARDNŞ-in büdcəyə köçürmələrlə bağlı vəziyyəti yaxşılaşıb. Bunu energetika sektoru üçün dövlət büdcəsində nəzərdə tutulmuş ARDNŞ tərəfindən istifadə olunmamış subsidiyaların həcmi üzrə 2006-cı ilin iyul ayının 1-nə olan məlumatlar da təsdiq edir. Məbləğ 278 mln. manat (ilin sonunadək bu rəqəm 438,5 mln. manata çatdırılacaq) təşkil edib ki, bu da Dövlət Neft Şirkətinin dövlət büdcəsinə olan borcunu (242 mln. manat) üstələyir.
