Azərbaycan və Polşanın milli bankları 3 istiqamətdə əməkdaşlığa dair razılığa gəlib. AMB-nin baş direktoru Rüfət Aslanlının "Trendə" verdiyi məlumata görə, əməkdaşlığın perspektivləri Azərbaycan-Polşa hökumətlərarası komissiyasının sentyabrın 11-12-də Varşavada keçirilmiş birinci iclası çərçivəsində müzakirə olunub.
Birinci istiqamət bank nəzarəti sahəsində əməkdaşlığı nəzərdə tutur. "Artıq bu istiqamətdə əməkdaşlıq qurulub və ötən il Polşa MB-nın ekspertləri Azərbaycanın bank nəzarəti sistemi ilə tanış olmaq üçün Bakıda olub", - deyə R.Aslanlı qeyd edib.
İkinci istiqamət çərçivəsində mərkəzi bankların makroiqtisadi modelləşdirmə sahəsində potensialının artırılması nəzərdə tutulur. AMB-də 3 model tətbiq olunur. Polşa MB-nın da öz modelləri var. "Bu, mərkəzi banklarının özlərinin yaratdığı kreativ predmetdir və müxtəlif yanaşmaları öyrənmək üçün digər MB-lə əlaqələrə malik olmaq çox faydalıdır", - deyə baş direktor hesab edir.
Polşa tərəfi Azərbaycanda pulların yuyulması və terrorun maliyyələşdirilməsinin qarşısının alınması sistemini öyrənmək arzusunu bildirib.
"Biz razılıq vermişik və onlar ölkəyə gələrək bizim təcrübəmizi öyrənə bilərlər. Çünki hazrladığımız qanun layihəsi ən gənc layihədir. Əlbəttə, bizim digər qanunları da öyrənmək imkanımız var idi. Bu, bizə müəyyən üstünlük verib. Yəqin ki, onlar sənədi öyrənib. Çünki bu, Avropa Şurasının "çirkli" pulların yuyulması üzrə Polşanın da iştirak etdiyi Mo¬ney¬val ekspert qrupunda açılıb. Buna görə də onlar təcrübəmizi öyrənməklə bağlı xahiş edib", - deyə R.Aslanlı dəqiqləşdirib. Üçüncü istiqamət üzrə məsələnin təfsilatı ilə öyrənilməsinə dair qərar qəbul olunub. Onun sözlərinə görə, əvvəlcə bunun necə təşkil olunacağının öyrənilməsi şərti ilə razılıq verilib. Buna görə də əlavə olaraq texniki məqamları da razılaşdırmaq lazımdır.
Bu üç istiqamət üzrə razılaşma əldə olunub və protokol imzalanıb.
