Azərbaycan parlamenti "1 yanvar 1992-ci ilə qədər əhalinin Azərbaycan SSR Əmanət bankına qoyduğu əmanətlərin indeksləşdirilməsi haqqında" qanun layihəsini səbirsizliklə gözləyir. Milli Məclisin iqtisadi siyasət daimi komissiyasının başçısı Ziyad Səmədzadənin Trend ə verdiyi xəbərə görə, ehtimal olunur ki, qanun layihəsi bu ayın sonunda parlamentə daxil olacaq.
"Bu məsələ üzrə Azərbaycan prezidenti tərəfindən yaradılmış dövlət komissiyası artıq öz təkliflərini hazırlayıb", - deyə o qeyd edib.
Azərbaycan prezidenti İlham Əliyevin oktyabr ayındakı sərəncamına əsasən 1 yanvar 1992-ci il tarixinin vəziyyətinə görə SSRİ-nin Əmanət bankının Azərbaycan şöbəsinə əhalinin qoyduğu əmanətlərin indeksləşdirilməsinə hazırlıq üçün baş nazir Artur Rəsizadənin başçılığı ilə dövlət komissiyası yaradılıb.
Azərbaycan Maliyyə Nazirliyinin ilkin hesablamalarına görə, indeksləşdirilmə 8 il ərzində aparılacaq və bu məqsəd üçün 600 mln. ABŞ dollarına qədər vəsait ayrılıb. Kapital Bank-da aparılmış inventarlaşdırma zamanı 1 mln. 986 min əmanətçi aşkar olunub. Onların əmanətlərinin ümumi məbləği 4,8 mlrd. sovet rublu təşkil edir. Maliyyə Nazirliyində indeksləşdirilmə üçün üç variant var: 0,3-0,4 mlrd. ABŞ dolları tələb edən, 0,5-0,55 mlrd. ABŞ dolları tələb edən və 0,8- 1 mlrd. ABŞ dolları tələb edən.
