Bu gün Daşkənddə Mərkəzi Asiya ölkələrinin hökumət nümayəndələri və beynəlxalq təşkilatların təmsilçiləri regionda sərhədyanı ticarətdə və vergi rejimində maneələrin müzakirəsinə başlayıblar. Trend in xəbər verdiyi kimi, Asiya İnkişaf Bankının (AİB) məlumatında bildirilir ki, Ticarət Siyasətinin Koordinasiyası Komitəsinin beşinci görüşü və ticarət siyasəti üzrə seminar AİB və Beynəlxalq Valyuta Fondu (BVF) tərəfindən AİB-in Mərkəzi Asiya regional iqtisadi əməkdaşlıq proqramı (CAREC) çərçivəsində təşkil olunub.
Görüşdə Azərbaycan, Əfqanıstan, Çin, Qazaxıstan, Qırğızıstan, Monqolustan, Tacikistan və Özbəkistan hökumətlərinin rəsmi nümayəndələri, eləcə də AİB, BVF, AYİB, UNDP, DB və GTZ təmsilçiləri iştirak edirlər.
Sənəddə qeyd edilir ki, görüş zamanı ölkə nümayəndə heyətləri komitənin tranzit ticarətində maneələrin azaldılmasına dair ötən görüşündə qəbul olunmuş tövsiyələrin yerinə yetirilməsi barədə məlumat verəcəklər. İştirakçılar həmçinin BVF-nin ticarət vergiləri ilə bağlı təkliflərini müzakirə edəcəklər. Qazaxıstan sərhədyanı ticarətdə maneələrin azaldılması çərçivəsində ilkin hesabatını təqdim edəcək, GTZ isə ticarət yardımı üzrə təqdimat keçirəcək.
Sənəddə deyilir ki, görüş iştirakçıları qeyd edirlər ki, Mərkəzi Asiya ölkələri ticarət əlaqələri, tranzit, gömrük təmizlənməsi və sairdə maneələrin azaldılması üçün həm bir-birləri, həm də yaxın ölkələrlə əməkdaşlığın yüksəldilməsinə ehtiyac duyurlar.
Tədbirin yekunu olaraq görüş iştirakçıları növbəti görüşdə və oktyabrın 18-20-də Urumçidə (Çin Xalq Respublikasının Sindzyan-Uyqur muxtariyyəti) keçiriləcək nazirlərin beşinci konrfansında gələcək müzakirələr üçün tövsiyələr hazırlayacaqlar.
