R.I. Investment şirkəti Ermənistanın işğal etdiyi Azərbaycan torpaqlarında qızıl yataqlarının istismarı ilə bağlı hüquqlarını müdafiə etmək niyyətindədir. Trend in xəbər verdiyi kimi, şirkətin rəhbəri Riza Vəziri oktyabrın 2-də jurnalistlərə bildirib ki, R.I. Investment şirkəti bu yataqlarda kəşfiyyat işlərinin aparılması ilə bağlı Ermənistan XİN, ABŞ Dövlət Departamenti, BMT və Britaniya XİN-ə öz narazılığını bildirib.
R.Vəziri bəyan edib ki, rəhbərlik etdiyi şirkət dəqiq sübutlar olduğu halda yataqların istismarı ilə bağlı məsələ qaldırmağa hazırdır və bunu öz borcu hesab edir. "Əgər hökumətdə bu məsələ ilə bağlı hər hansı sənəd varsa, biz bu məsələni dərhal qaldırmağa hazırıq", - deyə o sonda bildirib.
Şirkət bununla bağlı bir sıra araşdırmalar aparıb. Peykdən şəkillər çəkilib. Şəkillər göstərib ki, həqiqətən də Ermənistanın işğalı altında olan Azərbaycan torpaqlarındakı yataqlarda kəşfiyyat işləri aparılır.
R.I. Investment 1997-ci ilin avqustunda Azərbaycan hökuməti ilə ölkənin cənub-qərbində 6 yatağın (Gədəbəy, Ordubad, Qoşa Bulaq, Qızıl Bulaq, Vəjnəli və Söyüdlü) işlənməsi haqqında müqavilə imzalayıb. Müqavilədə 49% iştirak payı RI Investment Services Grour LLC şirkətinə, 51% - Ekologiya və Təbii Sərvətlər Nazirliyi qismində Azərbaycan hökumətinə məxsusdur.