Qara dəniz hövzəsi Beynəlxalq gəmi sahibləri assosiasiyasının (BİNSA) Bakıda keçirilən 10-cu toplantısında baxılacaq başlıca məsələlərdən biri gəmilərin Rusiyanın daxili sularından keçməsidir. Bu barədə Trend ə həmin təşkilatın prezidenti, Azərbaycan Dövlət Xəzər Dəniz Gəmiçiliyinin rəisi Aydın Bəşirov məlumat verib.
Onun sözlərinə görə, bir çox ölkələr, eyni zamanda Ukrayna və Azərbaycan da həmin prosesin sadələşdirilməsində maraqlıdır. Ukrayna tərəfi yükləri Xəzər dənizinə nəql etmək istədiyini bildirib.
A.Bəşirov qeyd edib ki, gəmilərin keçidi Rusiya Federasiyasının qanunu əsasında həyata keçirilir. Bu zaman Rusiya tərəfi tərəfləri inandırıb ki, imkan daxilində orada müvafiq dəyişikliklər etməyə çalışacaq.
Xəzər dəniz gəmiçiliyinin başçısı qeyd edib ki, gəmilərin Rusiyanın daxili sularından keçməsi yalnız daşıyıcıların deyil, həm də həmin ölkənin kanal xidmətlərinin xeyrinədir. Əgər Rusiya gəmiləri 6-7 min ABŞ dolları həcmində kanal rüsumları ödəyirlərsə, o zaman Azərbaycan və Ukrayna gəmiləri üçün bu məbləğ 30 min ABŞ dollarına bərabərdir.
Hazırda Azərbaycan Rusiyanın daxili sularından keçmək üçün birdəfəlik icazələr alır. Bu il Qara dənizdə elə bir vəziyyət yaranmışdı ki, yükü aparmağa icazəsi olmayan bir Azərbaycan gəmisindən yük digər, analoji, yükü Bolqarıstandan Azərbaycana çatdırmaq üçün icazəsi olan digər gəmiyə boşaltmaq lazım gəlib.
BİNSA-nın iştirakçı ölkələri arasında daha normal vəziyyət müşahidə olunur. Həmin təşkilatın iştirakçısı olan gəmilər üçün limanlarda və təmir zamanı güzəştlər tətbiq olunur. Bəşirov qeyd edib ki, bu il Azərbaycan bir gəmisini Ukraynanın Odessa limanında təmirə qoymaq fikrindədir. Onun sözlərinə görə, həm təmirin qiyməti, həm də işlərin görülmə müddəti Azərbaycan tərəfini qane edir.
