"Kredit ittifaqları - sosial və iqtisadi səmərəlilik" mövzusunda ikinci illik Konfrans oktyabrın 27-də Bakıda keçiriləcək. Bu barədə Trend ə Azərbaycanın Kredit ittifaqları assosiasiyasından (AKİA) məlumat verilib. Tədbir AKİA tərəfindən və USAİD-in maliyyələşdirdiyi "Maliyyə sektorunun inkişaf etdirilməsi ilə kiçik və orta sahibkarlığın dəstəklənməsi" layihəsinin icraçısı ACDİ/VOCA -nın maliyyə dəstəyi ilə təşkil olunub.
Konfransın keçirilməsinin başlıca məqsədi kredit ittifaqlarının beynəlxalq gününün qeyd olunmasıdır. Bununla əlaqədar hökümət üzvlərini, donorlar və əhalini Kİ-nin ölkənin iqtisadi və sosial həyatında, onların sosial və iqtisadi problemlərin (bölgələrin inkişafı, yoxsulluğun aradan qaldırılması, məcburi köçkünlərin azad edilmiş torpaqlara qaytarılması, kənd təsərrüfatının kreditləşməsinin inkişafı) həllində iştirakında rolu ilə tanış etmək planlaşdırılır.
Həmçinin Azərbaycanın kredit ittifaqlarından maliyyə nöqteyi-nəzərindən sabit, yeganə şəbəkənin yaradılması məsələsi gözdən keçiriləcək, Kİ rəhbərləri beynəlxalq Kİ-lərin qabaqcıl təcrübəsi ilə tanış olacaq, həmçinin hökümət nümayəndələrinin dəstəyi ilə Kİ maraqları lobbiləşdiriləcək.
Tədbirdə Nazirlər Kabineti, Milli Məclis, Milli bank, diplomatik nümayəndəliklərin, İqtisadi İnkişaf və Maliyyə Nazirliklərinin nümayəndələri iştirak edəcəklər.