Beynəlxalq Qara dəniz hövzəsi gəmi sahibləri assosiasiyasının (BİNSA) X iclası Bakıda işini başa çatdırıb. Bu barədə Trend ə Azərbaycan Dövlət Xəzər Dəniz Gəmiçiliyindən məlumat verilib. Görüşün sonunda memorandum imzalanıb.
Görüş zamanı Azərbaycan Dövlət Xəzər Dəniz Gəmiçiliyinin rəisi - assosiasiyanın prezidenti Aydın Bəşirovun səlahiyyətləri daha 2 il müddətinə uzadılıb. Baş katib Sergey Melaşenko qalıb. Vitse-prezident Qara dəniz gəmiçiliyinin başçısı Yevgeni Kojevin seçilib.
İclasda Assosiasiyanın tərkibi, BİNSA şurasının əvvəlki toplantısından sonrakı dövrdə görülmüş işlər, Assosiasiyanın maliyyələşdirilməsi, BİNSA-nın strukturu və heyəti, təşkilatın nizamnaməsindəki dəyişikliklər, 2006-2007-ci illər üçün iş planı, ABAROS layihəsi haqqında katibliyin hesabatı, icra orqanlarının seçilməsi, on birinci iclasın gündəliyi nəzərdən keçirilib.
Görüşdə Azərbaycan, Rusiya, Gürcüstan və Ukraynanın dəniz administrasiyalarının nümayəndələri iştirak edib.