2007-ci il üçün dövlət büdcəsi tərtib olunan zaman ilk dəfə olaraq Azərbaycan Maliyyə Nazirliyi büdcə xərclərini müxtəlif dövlət proqramları əsasında təqsim edib. Bu barədə Trend ə Maliyyə Nazirliyinin sosial sahələrin maliyyələşdirilməsi şöbəsinin müdiri Xaqani Rzayev məlumat verib.
Onun sözlərinə görə, büdcə xərclərinin proqramlar əsasında formalaşdırılması ilə bağlı tapşırıq Prezidentin 31 may 2005-ci il tarixli "Antiinflyasi tədbirlərinin gücləndirilməsi haqqında" fərmanında verilib.
"Bu cür xəcrləmə prinsipi büdcə vəsaitlərindən məqsədyönlü şəkildə istifadə etməyə imkan yaradacaq. Həmçinin maliyyəçilərə büdcə xərclərinə nəzarət etməyi asanlaşdıracaq", - deyə X. Rzayev hesab edir.
Gələn il üçün xərclər təhsil sistemində 4, səhiyyədə 11, mədəniyyət, incəsənət, informasiya və bədən tərbiyəsində 3 proqram əsasında formalaşdırılıb.
Gələn il üçün büdcənin xərclər hissəsi, gəlirlər 5 335 700 min AZN olduğu halda, 5 714 700 min AZN səviyyəsində təklif olunub.
