Dünən Azərbaycan parlamenti 2007-ci il dövlət büdcəsi layihəsinin müzakirəsinə başlayıb. Bu barədə Trend xəbər verir. Maliyyə naziri Samir Şərifov deputatları 2006-cı ilin sonunadək makroiqtisadi göstəricilərin gözlənilən nəticələri haqqında məlumatlandırıb. ÜDM həcminin 26% artımla 18,1 mlrd. manat səviyyəsində olacağı gözlənilir. Nazir bunun dünyada rekord göstərici olduğunu hesab edir.
Onun sözlərinə görə, gələn il ÜDM-də neft sektorunun artımının 45%, qeyri-neft sektorunun artımının isə - 9% olacağı ehtimal olunur.
2007-ci il dövlət büdcəsinin gəlirli hissəsinə neft sektorundan daxilolmalar ənənəvi olaraq üstünlük təşkil edəcək və onların xüsusi çəkisi 56% təşkil edəcək. S.Şərifov bildirib ki, qeyri-neft sektorundan daxilolmalar əsasən vergiqoyma hesabına formalaşacaq.
Ümumilikdə büdcənin gəlirli hissəsi 5 mlrd. 336 mln. manat həcmində proqnozlaşdırılır, bu isə 2006-cı il proqnozundan 1,5 mlrd. manat artıqdır. Büdcə daxilolmalarının strukturunda Vergilər Nazirliyinin payına 74,6%, Dövlət Gömrük Komitəsinin payına isə - 11,8% düşür.
Nazirin sözlərinə görə, büdcə xərcləri ilk dəfə məqsədli proqramlar əsasında paylaşdırılıb və büdcə formalaşarkən onun sosial və investisiya istiqaməti nəzərə alınıb. Gələn ilin büdcəsi çərçivəsində əmək haqqının minimal həcminin və təqaüdün baza hissəsinin 50 manata qədər çatdırılması planlaşdırılır.
Büdcənin çıxar hissəsində həmçinin Milli sahibkarlığın dəstəklənməsi fondu üçün 80 mln. manat, İpoteka fondu üçün - 20 mln. manat həcmində vəsaitlər ayrılıb.
Daxili və xarici dövlət borcları üçün 1,8 mlrd. manat nəzərdə tutulub. Onlardan 180 mln. manat daxili borc, 1,6 mlrd. manat - xarici borcdur. Nazir bildirib ki, hər bir Azərbaycan vətəndaşına düşən xarici borcun həcmi 226 ABŞ dolları təşkil edir, bu isə dünyada qəbul olunmuş xarici borc standartlarına zidd deyil.