2006-cı ilin yanvar-sentyabr aylarında ölkə ərazisində fəaliyyət göstərən hüquqi və fiziki şəxslər dünyanın 133 ölkəsi ilə xarici ticarət əlaqələri qurub. Trend in Dövlət Statistika Komitəsinə istinadən xəbər verdiyi kimi, həmin dövrdə xarici ticarət dövriyyəsinin ümumi həcmi 8.6 milyard ABŞ dolları, o cümlədən ixrac 4.8 milyard və idxal 3.8 milyard dollar təşkil edib, 1068.8 milyon dollarlıq müsbət xarici ticarət saldosu yaranıb. 2005-ci ilin doqquz ayı ilə müqayisədə xarici ticarət dövriyyəsinin həcmi 1.5 dəfə, o cümlədən ixrac 1.9 dəfə, idxal isə 17.2 faiz artıb.
İxrac-idxal əməliyyatlarının 46.9%-i AB ölkələri, 24.8%-i MDB ölkələri, 28.3 %-i digər dövlətlərlə aparılıb. Ümumi dövriyyənin 63.3%-i Avropa, 33.4%-i Asiya, 2.6%-i Amerika, 0.6%-i Afrika qitəsi ölkələrinin, 0.1%-i Okeaniyanın payına düşüb.
Xarici ticarət əməliyyatlarının 81.0 %-i Türkiyə, İtaliya, Rusiya, İsrail, Birləşmiş Krallıq, Türkmənistan, Fransa, Almaniya, İran, Gürcüstan, Ukrayna, Qazaxıstan, Çin və Amerika Birləşmiş Ştatlarının hesabına formalaşıb.
