İslam İnkişaf Bankı Azərbaycanla ölkədə mövcud olmayan yeni maliyyə vasitələri ilə sıx əməkdaşlıqda maraqlı olduğunu bildirib. Nazirlər Kabinetindən Trend -ə bildiriblər ki, bu arzu İİB prezidenti A.Məhəmməd Əlinin Azərbaycanın baş naziri Artur Rəsizadə ilə keçən həftə Bakıda görüşündə vurğulanıb.
İslam Bankı maliyyə əməkdaşlığının yeni istiqamətləri arasında xidmətlərin, ixrac və idxal əməliyyatlarının maliyyələşdirilməsini təklif edir.
Azərbaycan höküməti ilə İİB ölkədə investisiyalara texniki yardımın (İTAP) reallaşdırılmasına başlayır. Proqram daxili investisiyaların aktivləşdirilməsi üçün hökümət agentliklərinin potensialının artırılmasına yönəlib. Belə proqram Malayziya, Tunis, Albaniya, Bosniya və Herseqovinada da həyata keçirilib.
Bankla Azərbaycanın xüsusi sektorunda layihələrin maliyyələşdirilməsi haqqında razılıq əldə olunub. Bu razılaşmaya əsasən, bank dövlət zəmanəti olmadan $ 90 milyon verməyə hazırlaşır. Bu proqrama bitkiçilikdən tutmuş biznes-mərkəzlərinin və sərgi pavilyonlarının tikintisinə kimi müxtəlif sahələri əhatə edən 6-7 layihə daxildir. 8-9 noyabrda Bakıda keçirilən investisiya konfransı çərçivəsində İİB və AtaHoldinq arasında biznes mərkəzlərinin və sərgi kompleksinin tikintisi üçün 36 milyon dolların, Billur(Gəncə) şirkəti ilə yenidənqurma, avadanlıqların və kompüter texnikasının alınması üçün $10 milyonun, Naxçıvanın tikinti materialları istehsal edən Interyer şirkəti ilə $25 milyonun, iki mühəndis şirkəti ilə biznes-mərkəzin yaradılması üçün $16 milyonun və həmçinin Masallı rayonunda amarantın emalı üçün $6,5 milyonun ayrılması haqqında saziş imzalanıb.
1992-ci ildən bəri İİB ölkədə $250 milyon dəyərində 26 layihəni maliyyələşdirib.
