Azərbaycan Maliyyə Nazirliyi sığorta fəaliyyətinin həyata keçirilməsi üçün xüsusi icazə verib. Maliyyə Nazirliyinin Sığorta nəzarəti şöbəsinin rəisi Namiq Əliyevin Trend ə verdiyi xəbərə görə, mövcüd qanunvericiliyə uyğun olaraq, lisenziya "AzSığorta" səhmdar cəmiyyətinə verilib.
O, 1 mln. manat məbləğində nizamnamə kapitalı ilə bir fiziki şəxs tərəfindən təsis olunub. "AzSığorta"nın lisenziyasında icbari sığorta üzrə 3-4 növ və könüllü sığorta üzrə 20 -dən artıq növə icazə verilib.
Son vaxtlar bu, ölkədə sığorta fəaliyyəti üçün verilmiş ikinci lisenziyadır. Bu il icazə "Pasha Sıgorta" qapalı səhmdar cəmiyyətinə verilib. Hazırda ölkədə artıq 29 sığorta şirkəti fəaliyyət göstərir.
2006-cı ildə Sığorta nəzarəti şöbəsi "Azərqarant" və "Abşeron" sığorta şirkətlərində aparılmış yoxlamalar zamanı aşkar olunmuş pozuntularla bağlı həmin şirkətlərin lisenziyalarını məhdudlaşdırıb. Ötən il nazirlik "Günay Anadolu" və "Era Trans"da bəzi sığorta növləri üzrə icazələrin fəaliyyətini dayandırıb, lakin indiyədək onlar məhdud lisenziyalarla fəaliyyət göstərirlər.
