Almaniyanın paytaxtında Azərbaycan-Almaniya biznes-forumunun təşkili üçün hazırlıq işləri davam edir. Bu barədə Trend ə Azərbaycanın Almaniyadakı səfirliyinin ikinci katibi Nəsimi Ağayev məlumat verib. O qeyd edib ki, forumun keçirilməsi 2006-cı ildən planlaşdırılır və səfirlik Almaniya və Azərbaycanın müvafiq orqanları ilə danışıqlar aparır.
Səfirlik nümayəndəsinin sözlərinə görə, 2007-ci il ərzində Azərbaycan prezidenti İlham Əliyevin Almaniyaya səfəri gözlənilir və səfirlik artıq bir neçə aydır ki, dövlət başçısının ikitərəfli səfərinin təşkili üçün iş görür.
Xatırladaq ki, Azərbaycanın İqtisadi İnkişaf Nazirliyi (İİN) və Azərbaycanda ixracın və investisiyaların təşviqi fondu (AZPROMO) 2007-ci il fevralın 15-də Berlində keçirilməsi planlaşdırılan Azərbaycan-Almaniya biznes-forumunun hazırlığına başlayıb. Bu barədə əvvəl Trend ə İİN-nin sahibkarlığın inkişafı üzrə Departamentinin müdiri Samir Nuriyev məlumat verib.
Azərbaycan-Almaniya biznes-forumunun hələ 2006- cı ilin dekabrında Ştutqardda keçirilməsi planlaşdırılırdı, lakin o, təxirə salınıb. Azərbaycandan təxminən 25 sahibkarın iştirak edəcəyi gözlənilir.
