Azərbaycan,Bakı/müxbir Trend Ü.İsmayılova/ "Azergarant" sığorta şirkəti birinci rübün yekunlarını elan edib. Şirkətin idarə heyətinin sədr müavini Şükür Hüseynovun çərşənbə axşamı verdiyi məlumata əsasən, birinci rübün göstəriciləri 2006-cı ilin analoji dövrünün göstəricilərini cəmi beş faiz üstələyib.
Birinci rübdə göstəricilərin əhəmiyyətsiz artımı öhdəliklərin və fəaliyyətin yerinə yetirilməsində pozuntulara yol verilməsi səbəbindən şirkətin iki əsas sığorta növü üzrə (icbari KASKO və əmlakın sığortası) lisenziyasının müvvəqəti ləğv olunması ilə əlaqədardır. Lisenziya şirkətə həmin ilin noyabrında qaytarılıb.
"Azergarant"dan qeyd olunub ki, 2006-cı ilin aprelindən noyabrına qədər sığortanın iki gəlirli növü üzrə lisenziyanın olmaması çox sayda müştərilərin itirilməsinə gətirib çıxarıb. 2007-ci ilin birinci rübündə şirkətin gəlirlərinin əhəmiyyətsiz artımı məhz bununla əlaqədardır.
Ş.Hüseynov qeyd edib ki, "Azergarant" korporativ menecmentliyin səviyyəsinin artırılması üçün marketinq şöbəsi açıb.
"Bu şöbə şirkətin yalnız baş ofisinin işi ilə deyil, həmçinin şirkətin filial və nümayəndəliklərinin işi ilə də məşğul olur" - deyə o, bildirib. Şirkətin nümayəndəlikləri Əli Bayramlı və Şəkidə, filialları isə Quba, Zaqatala və Gəncədə fəaliyyət göstərir.
1993-cü ildən fəaliyyət göstərən "Azergarant" 25 sığorta xidməti göstərir ki, bunun da üç növü icbaridir.
