Azərbaycan,Bakı/müxbir Trend İ.Xəlilova/Azərbaycan şirkətləri aprelin 18-də Karlsruedə keçiriləcək 13-cü beynəlxalq yenidən istifadə olunan dəzgah və mexanizmlərin "RESALE 2007" beynəlxalq ticarət yarmarkasında iştirak edəcək. Bu barədə Azərbaycanın İxrac və İnvestisiyaların Təşviqi Fondunun (AZPROMO) prezidenti Emil Məcidov məlumat verib. Şirkətlərin səfərini AZPROMO Almaniyanın Texniki Yardım Cəmiyyəti (GTZ) ilə birgə təşkil edir.
"Karlsruedə yarmarka yaxşı münasib qiymət, avadanlığın vəziyyəti və keyfiyyəti ilə fərqlənir. Orta Azərbaycan şirkətləri üçün bu, məqbul qiymətə lazımi avadanlıqları tapmaq üçün yerdir" - deyə Məcidov bildirib.
"RESALE" bu cür sərgilər arasında dünyada ən böyük sərgi hesab olunur. Karlsruedə yarmarka inkişaf etməkdə olan və yeni sənaye ölkələri üçün böyük əhəmiyyətə malikdir. Həmin ölkə nümayəndələri yüksək istehsallı avadanlıqları münasib qiymətə almaq imkanı əldə edir. Hər il 100-dən çox ölkədən 10 mindən çox ziyarətçini cəlb edən yarmarkada sənayenin bütün sahələri, həmçinin metal emalından tutmuş nəşriyyat işinə qədər nadir avadanlıqlar təqdim olunacaq.
