Azərbaycan,Bakı/müxbir Trend İ.Xəlilova/Dünya Bankı (DB) ilə danışıqların yekununa əsasən, sənədlər paketinin imzalanması mayın 5-dək mümkün olacaq. Bu barədə bazar ertəsi DB-nin Bakı nümayəndəliyndən məlumat verilib. Danışıqlar keçən həftə Azərbaycanın kiçik şəhərlərinin su təchizatı və kanalizasiya sistemlərinin yaxşılaşdırılması layihəsi üzrə aparılıb.
Layihələr qrupunun rəhbəri Andreas Rodenin başçılıq etdiyi missiya öz tərəfindən artıq danışıqlar protokolunu imzalayıb. Azərbaycan tərəfindən sənədin imzlanmasına maliyyə, iqtisadi inkişaf nazirləri icazə verməlidir. Bundan sonra sənədlər paketi imzalanmaq üçün baş nazirə təqdim olunacaq. Daha sonra təsdiq üçün DB-nin Direktorlar Şurasına təqdim olunacaq.
Nümayəndəlikdən həmçinin qeyd olunub ki, hökumət danışıqlar prosesindən öncə bütün şərtləri yerinə yetirib: "Azərsu"nun və DB-nin maliyyələşdirdiyi "Böyük Bakının su təchizatı" birinci su layihəsinin auditi keçirilib.
Azərbaycanın kiçik şəhərlərinin su təchizatı və kanalizasiya sistemlərinin yaxşılaşdırılması layihəsi 310 mln. dollar məbləğində qiymətləndirilir. Bunun 230 milyon dolları DB-nin kredit resursları, qalanı isə (80 mln. dollar) hökumətin payına düşür.
Birinci komponent çərçivəsində su təchizatı və kanalizasiya sistemləri infrastrukturlarının, kiçik şəhərlərdə şəbəkə və təmizləyici obyektlərin bərpasının investisiyalaşdırılmasını nəzərdə tutur.
Birinci mərhələdə işlər 10 rayon mərkəzlərində keçiriləcək (Ağstafa, Biləsuvar, Goranboy, Qəbələ, Quba, Saatlı, Oğuz, Xanlar, Tovuz, Zaqatala, Hacıqabul, Qazax, Qax, Mingəçevir, Sabirabad, Samux, Şəmkir, Tərtər və NMR (Şərur və Babək). Layihə ümumilikdə 20 rayonu əhatə edəcək.
İkinci komponentdə Böyük Bakı və Abşeron yarımadasının su təchizatı sisteminin inkişafı üzrə Baş Planının hazırlığı üçün texniki yardımın göstərilməsi nəzərdə tutulub. Üçüncü komponentə maliyyə hesabatının beynəlxalq standartlarının tətbiqindən başlamış billinq sisteminədək (su istifadəsinə görə ödəmənin yığımı) "Azərsu" SC-nin institusional müasirləşdirilməsi daxildir.
Layihənin reallaşdırılması 2012-ci ilədək hesablanıb.
