Azərbaycan, Bakı/ Trend müxbir İ.Xəlilova/ Mayın 13-də Azərbaycanın Mədəniyyət və Turizm Nazirliyi BMT-nin İnkişaf Proqramı (UNDP) ilə birgə Quba rayonunda beşinci regional turizm informasiya mərkəzini açacaq. Bu barədə çərşənbə günü turizmin inkişafı layihəsi üzrə koordinator Faiq Qürbətov bildirib. Açılış mərasiminin mədəniyyət və turizm naziri Əbülfəz Qarayev və UNDP rezident-koordinatoru Bruno Puezanın iştirakı ilə keçəcəyi gözlənilir.
2007-ci il aprelin 2-dən həyata keçirilən turizmin inkişafı layihəsinin ikinci mərhələsi çərçivəsində dörd regional mərkəzin Quba, Lənkəran, Gəncə və Zaqatalada açılışı planlaşdırılır. Lənkəranda mərkəzin açılışı iyunun əvvəlinə planlaşdırılır. Ölkədə artıq Şamaxı, Şəki, Xaçmaz və Bakıda birinci mərhələ çərçivəsində yaradılmış mərkəzlər fəaliyyət göstərir.
Bu mərkəzlərin yaradılmasında əsas məqsəd regiona gəlmiş turistlərin ərazi, turizm obyektləri, marşrutlar barədə məlumatlandırılmasıdır. Bununla yanaşı, mərkəzlərdə turizm xidmətləri də göstəriləcək.
Layihə çərçivəsində "turizm.az" - turizm portalının yaradılması da nəzərdə tutulur. Qürbətov bildirib ki, bu istiqamətdə hazırlıq işləri may ayının sonuna qədər başa çatdırılacaq. Bu portal vasitəsilə turistlər regionlar, turizm marşrutları, otel və şirkətlər barədə məlumat ala biləcəklər. Yerli informasiya mərkəzləri isə gündəlik olaraq konkret region üzrə bu məlumatları yeniləyəcəklər.
Layihənin birinci mərhələsinin qiyməti 240 mln. dollar olub ki, bu məbləğ də yarıbayarı UNDP qrantı və Azərbaycan hökumətinin vəsaitləri hesabına təmin olunub. İkinci mərhələ isə 410 mln. dollar dəyərində qiymətləndirilir ki, burdan da müəyyən məbləğdə vəsait yeni yaradılmış Turizm İnstitutuna yardım üçün ayrılacaq. Vəsaitlər xüsusilə Institutda araşdırma mərkəzi, iki kompüter laboratoriyası, elektron kartotekalı kitabxana yaradılması, Baloniya sistemi çərçivəsində tələbələr üçün Avropa Kredit sisteminin tətbiqinə sərf olunacaq.
Layihənin icrasına "Azərbaycanda yoxsulluğun azaldılması" Dövlət Proqramı (2003-05-ci illər) çərçivəsində 2004-cü ildən başlanılıb. Birinci mərhələ 2006-cı ilin ortasında sona çatıb. İkinci mərhələ isə iki ili əhatə edir.